Inatsit tunngaviusoq

Ataani ineqarnermut tapiiffigineqarsinnaanermut aammalu inatsimmut tunngaviusut naatsumik nassuiarneqarput. Annertunerusumik paasisaqarnerorusuttut Ilaqutariinnermut, Naligiissitaanermut Isumaginninnermullu Naalakkersuisoqarfiup nittartagaanut http://naalakkersuisut.gl – imut innersuunneqarput, tassani isumaginninnermut inatsisinik atuuttunik nalunaarutinillu il.il. atuartoqarlunilu aallertoqarsinnaavoq.

 

Ineqarnermut tapiissutit

Inoqutigiit ineqarnermut tapiiffigineqarsinnaapput pineqartut Inatsisartut Peqqussutaanni inissianut attartortakkanut tunngasut malillugit najugaqartuuppata, soorlu:

 

·       Inoqutigiinni inersimasut meeqqallu pineqartut tamarmik aalajangersimasumik inigisami najugaqartuuppata.

·       Inoqutigiit ataatsimoorlutik isertitaat akileraarutaasussat aammalu meeqqat aalajangersimasumik inigisami najugaqartut amerlassusaat tunngavigalugit ineqarnermut tapeqartitsisoqartarpoq.

·       Inigisami init amerlassusaat najugaqartut amerlassusiannik ataatsimik amerlaneruppata ineqarnermut tapeqartitsisoqarsinnaanngilaq.

 

Ineqarnermut tapiissut ineqarnermut akiliummut taamaallaat tapiissutaavoq. Atuinernut allanut atuinermilu akileraarutinut allanut tapiissutaanatik. Ineqarnermut tapiissut ineqarnermut akiliutip namminnerlu agguaqatigiissillugu akilersinnaasat procentinngorlugit naatsorsorneqartarput, inoqutigiinni isertitat akileraarutaassussat aammalu naatsorsuutigalugulu isertitassat meeqqallu amerlassusaat malillugit.

 

Inatsisartut Peqqussutaat nr. 3 31. maaji 2001-imeersoq inissianut attartortakkanut ineqarnermut tapiissuteqartarneq pillugu 1. januaari 2002-mi atuutilersoq malillugu ineqarnermut tapeqartitsisoqarpoq.